วันที่ พฤหัสบดี สิงหาคม 2555

พิมพ์หน้านี้  |  ดูบล๊อกอื่นๆ ที่ OKnation

 

บักหำน้อย กลอนลำชีวิตลูกอีสาน


 

บักหำน้อย  กลอนลำชีวิต 

ดินสอดำบ่าวภูสวาง เขียน

---------

 

"บักหำน้อย”เป็นภาษาพื้นบ้านของคนอีสาน

ที่พ่อแม่พี่น้องใช้สำหรับเรียกลูกชายน้องชายหรือเด็กน้อย

หรือผู้เฒ่าผู้แก่ทั่วไปเรียกเด็กน้อย

เช่น “ บักหำน้อย แม่มึงไปไส!” แปล ไอ้ตัวเล็ก แม่เธอไปไหน!

 

...คึดฮอตวันนั้นที่บ้านนาเฮา

 คิดเห็นเด้วันเก่าเก่า แต่คราวเป็นบ่าวขึ้นใหม่ใหม่

 อยากกลับไปเป็นบักหำน้อยของเอื้อยและอ้าย

เป็นเด็กบ่คึดหยังหลาย อยากหมุนโลกไปอีกเด้สักคราว

เป็นเด็กน้อยคือจั๋งม่วนหลาย อยากหวนกลับไปที่บ้านนาเฮา....

...จากนามาแล้วก็หลายปี จนสู่มื้อนี้ข่อยกลายเป็นคนเมือง

 บ้านเกิดอยู่เมืองอุบล มาอยู่ไทยดนชีวิตยังฝืดเคือง

เช่าบ้านอยู่แถวดอนเมือง แต่หัวใจอยู่ที่บ้านนาเฮา

...บ้านเก่าจั๋กสิเป็นจั๋งได๋ หลายปีบ่ได่ไปยามถามข่าว

 อยู่สุขสบายดีบ่หนอ เก็บเกี่ยวข้าวดอพอใช้บ่หนี้เขา

ฝนลาฟ้าเปลี่ยนเข้าหน้าหนาว ปานนี้ผู่เฒ่าสิจมหาอยู่วอนวอน...

เป็นห่วงหมู่เจ่าห่มผ้าแหน่เด้อยามนอน....

(ลำ)..ใจสะท้อนมาอาทรความเก่า ๆ

ยามเมื่อเจ็บปวดร้าวจักสิเว่าต่อไผ

 บ้านใกล้ใกล้ฮั่วอยู่ติดกัน แต่ว่าความสัมพันธ์ห่างกันคือฟ้า…

...บ้านนาถึงสิจนข้นแค้น แต่ใจเหนียวแน่นเอื้อเฟื้อแบ่งปัน

 ป้าแตงเพิ่นแกงหนอไม้ ยังแบ่งไปให้บ้านพ่อใหญ่สัมพัน

แขกไปใครมาหน้าบ้าน ยังเอิ้นตามกันกินข้าวแล้วบ่

..คึดพ่อแต่คราวแต่กี้ แล่นเล่นบักลี้อยู่ข้างกุฎิหลวงพ่อ

 เดือนแจ้งที่ลานวัดปีนั้น เล่นลี้ข้าวสารเฮานัดกันมารอ

 มอญซ่อนผ้ายังจำได้หนอ เคยไล่หยอกล้อน้องสาวไห่บ่เซ่า..

ได่ออยเอาเจ้ากะยังให่บ่เซา..

(ลำ)..เคยควงเจ้าผู่สาวนอขึ้นใหม่ๆ

ไปฟังลำบ้านใต้เบิ่งหนังบ้านฝั่งเหนือ

มีสุขเรื่อเมื่อฮักเฮาปลง คืนวันลอยกระทงอธิฐานเคียงเจ้า

...เหงาในใจต่อเนื่อง มาเป็นคนเมืองมีแต่เรื่องให้ปวดร้าว

 คึดฮอตซุ้มกองเฟืองยามหน้าหนาว นอนฟังธนูว่าวลอยมาอยู่ดื้อดื่น

..คืนนี้ที่เมืองกรุงเทพ ใจที่บาดเจ็บร่ำร้องจนค่อนคืน

 อยากกลับไปเป็นเด็กเหมือนวานซืน

มีแต่คนหยิบยื่นทุกข์บ่มีดอกหนา

มีแต่คนคอยยื่นสนุกสนานเฮฮา...

(ลำ)..หลายปีหล้าเวลาแปรเปลี่ยนๆ

  คือสิเวียนบ่ได่ไปมื่อเก่าหลัง หลายสิ่งฮ่างหลายสิ่งสูญไป

 เหลือตายายกับหลานอยู่เฮือนมันฮ่าย

ขอวอนอ้ายขอวอนน้องพี่ๆ

คันได่ดีมือหน้าส่อยชูค้ำแหน่เด้อ

ใจยังเพ้อความเก่าความหลัง

ลูกอีสานมาไกล ใจบ่ลืมบักหำน้อย

ข่อยอยากเป็น..บักหำน้อย บักหำน้อย....

  -------------------

โดย ดินสอดำบ่าวภูสวาง

 

กลับไปที่ www.oknation.net