วันที่ ศุกร์ ธันวาคม 2556

พิมพ์หน้านี้  |  ดูบล๊อกอื่นๆ ที่ OKnation

 

~~ เสียงจากฟากท่ง ~~


~~ เสียงจากฟากท่ง ~~ ลำล่องสาวดงหินแฮ่ กลับบ้าน

แพรห่อฝัน

-----------------

 


นับแต่ได่จากบ้าน ไปสู่เมืองสวรรค์
ลืมแล้วห่มกกทัน บ่อนที่เธอเคยซ้น

จากไปโดนบ่เห็นหน้า..
คือจั่งหมากตูมกา ลาก้านแล้วลืมกิ่ง
ผีแฟชั่นเข้าสิงห์ ไลน์ไอโฟนเข้าแทรก
ส่ำบ่น้องจั่งห่างเหิน

ไปหลงเพลินเมืองฟ้า..
ลืมแล้วกลิ่นชาวนา ลุงป้าก้มหน้าต่ำ
ย่างสยามพารากอน ลืมดอนด้าวห่มกระโดน

เคยงอยโพนยามแล้ง..
เทียวเก็บดอกสะแบง มาแต่งแต้มแสมผมอุ่น
เธอกะยังนอนหนุน ตักพี่ชายคุ้นๆอยู่เถียงน้อยจำได่บ้

ถิ่มหัวใจไปพบพ้อ คนรูปหล่อแนวเกาหลี
ลืมเลยนอคนดี วัฒนธรรมเฮาเคยใช้

ทรงผมใหม่ทั้งเสื้อผ้า สร้อยสวมใส่ นาฬิกา
ศัลยกรรมมาร์กหน้า เสริมดั้งได่โด่งงาม

ละยามคนถามคนส่อ เจ้ากะต่อวาจาหวาน
ภาษาถิ่นทางอีสาน เฮ็ดสำเนียงบ่เป็นแล้ว

หัวมันแกวที่เคยลิ้น ในถั่วดินส้มผักบัว
หอมลาบเทาใส่ข้าวคั่ว เคยนัวลิ้วกินบ่เป็น

เจ้าไปหัวไปเล่น เปลี่ยนไปเป็นแล้วคนใหม่
รสกิมจิเข้าไส้ ลืมแกงหน่อไม้ใส่กระถิน

"..ทิ้งถิ่นฐานบ้านเฮาให้เหงาเศร้า
ปล่อยพ่อแม่น้องสาวเฝ้าถามหา
กี่ปีใหม่สงกรานต์บ่เห็นมา
สายลมหนาวพัดส่าสุดหนาวใจ.."

ถึงสิเปลี่ยนไปได่ ไปหลงเห่อทันสมัย
เปลี่ยนบ่ได่ดอกน้องหล้า ความเป็นเชื้อชาติอีสาน

สิงห์อยู่ในโตเจ้า ฝังอยู่ในใจเฮา
คือรากเหง้า ให้สานต่อ
เก็บไปใช้ให้พอ ไปเคลียร์คลอให้คุ้ม
จึงหวนกุ้มสู่ดั่งเดิม

" สองอ้อมแขนของพี่ชายยังคอยเริ่ม
หนึ่งหัวใจยังคอยเติมให้ความหวัง
ยังเฝ้าคอยเจ้านกน้อยที่จากรัง
ผิดกี่ครั้งอ้ายก็ยังให้อภัย "

เกิบอีแตะยังรอใช้..
เถียงนาน้อยยังคอยใจ สัญญาฮ้างยังรออุ่น
ทั้งพ่อแม่ท่าแต่ลุ้น น้องสาวพร้อมเฝ้าจ่มหา

สิสระปลาไว่ท่า มื้อได๋มาสิได่อิ่ม
ลาบปลาข่อพอได่ชิม จิ้มข้าวเหนียวฮ้อนๆ
ออนชอนยอดผักกระโดน

สิเตรียมฝ้ายไว่ท่า เตรียมพาขวัญไว่ท่าสู่
ขอให้ฮักนำพา บุญผลาส่งยู้
ให้คืนบ้าน..ถิ่นฮักเฮา..เด้อละนาง..โอ..เด้อคำเอ่ย.

"โอ้ยนอ เกือบบ่รอด ! "


ลำนำอีสานสัญจร

15 ธันวาคม 2556

-------------------

โดย ดินสอดำบ่าวภูสวาง

 

กลับไปที่ www.oknation.net